martes, 17 de junio de 2014

El Glayíu de les fiestes

¡EXTRA¡ ¡EXTRA!

¿Visti daqué y nun te cree naide cuando-y lo cuentes? 
¿Escribisti un cuentu y nun te lu publicó la editorial más grande qu’atopaste? 
¿Sácate fotos la cámara ensin querer y nun sabes qué facer con elles? 
¿Tienes bona mano pal dibuxu y quies compartilo col to vecindariu?

Si te pasó dalgún d’estos casos, o si non te pasó pero quies contar, dibuxar, fotografiar... daqué, habíes mandar les tos aportaciones a avvelremediu@gmail.com o dexáles nel Centru Social de La Pría.


Tamos yá pa preparar la edición d’EL GLAYÍU que se saca pa les fiestes y toles aportaciones son mui bien llegaes (por eso de que salga una revista amañosa).

Pa poder trabayar na revista con tiempu prestábanos tener los materiales a más tardar pa la primer selmana  del mes qu’entra.


AVV EL REMEDIU, 17 de xunu de 2014

San Xuan 2014 + Sustiferia el domingu 22

San Xuan 2014

Paecía que nun diba llegar pero ya tenemos ehí la nuechi más corta, el día más llargu... y la foguera más célebre del añu.

Esti llunes 23 vémonos na 
Fonte'l Forcáu a les 22:00 h.

Val con que traigas un peazu empanada, una tortiella, daque dulce o lo que más te venga en gana, l’avv pon la bebida.

Y pa iguar un pocu l’entornu y preparar la foguera vamos xuntanos en sustiferia el domingu 22, p’hacia les 10 de la mañana, na mesma fonte.


Avv d’El Remediu

viernes, 6 de junio de 2014

Reseña sobre ¿Ú tán les muyeres? ausencies y presencies femenines nos medios de comunicación


El 30 de mayu pasáu, vienres, ficimos un recorríu reflesivu pol papel de la muyer en bien d'ámbitos: prensa escrita, publicidá, televisión, cine, redes sociales y llinguaxe, de la  mano de Beatriz Redondo.
Asina, vimos que namás qu'un 10% de les noticies se centren en muyeres, qu'a partir de los 50 años yá casi nin apaecen, y si apaecen ye en relación col so parentescu, o como víctimes.

Tamién empecipiamos a ver la publicidá como un mediu idóneu col qu'afitar estereotipos, convertir a la muyer n'oxetu: "Muyeres males, muyeres animales, muyer cosa, muyer neña mala..."

Deprendimos estratexes p'analizar anuncios, películes, series... Agora vamos tar atentes a si nuna película apaecen polo menos dos personaxes femeninos que lleguen a falar un minutu de daqué que nun seya un personaxe masculín (test de Beschdel).

P'acabar, y per equí fue per onde s'abriera'l debate, discutimos si se falaba de les muyeres cuando se falaba en masculín "xenéricu", :

¿Qué quier dicir que "L'home inventó'l fueu"?
¿En qué tará pensando la RAE cuando da esta definición?:
huérfano, na.
(Del b. lat. orphănus, y este del gr. ὀρφανός).
1. adj. Dicho de una persona de menor edad: A quien se le han muerto el padre y la madre o uno de los dos, especialmente el padre. U. t. c. s.
Y si procedía usuar el femenín pa referise al hombre (como según la RAE, "hombre" ye varón o muyer...) y  tamién sobre si había qu'economizar nel llinguaxe (dicir "toos" en cuenta "toos y toes"), p'asina poder tener pallabres abondo pa falar de "Efectos previstos por la normativa por impagu" (deshauciu), o "Su Majestad El Rey Don Juan Carlos..."


Pues eso ye, que siempre ye bon día p'acabar siendo un poquiñín más sabies.
Munches gracies, Bea.